Nei til felles ungdomsskule på Hafstad!

Ein rapport frå Norconsult hevdar at det er plass til 550 elevar på Hafstad vidaregåande. I eit debattinnlegg i Firda, https://www.firda.no/felles-ungdomsskule-pa-hafstad-til-det-beste-for-kven/o/5-15-1861028, tydeleggjer dei tillitsvalde på Førde ungdomsskule og Halbrend ungdomsskule, at dette er ei sanning med modifikasjonar. Dette vert ein skule med svært store manglar, noko som vil gå ut over kvaliteten på undervisinga, læringsmiljøet og det psykososiale miljøet til elevane.

Her er nokon av problemområda knytt til å bruke Hafstad som ungdomsskule:

Beliggenheit: Med elva på den eine sida, og E39 på den andre, kan det fort oppstå farlege situasjonar.

Mindre oversiktlege ungdomsmiljø. Ein stor skule i sentrum vil kunne føre til at ein ikkje klarar å ha same oversikta som ein har i dag. Det vil kunne bli vanskelegare å hindre at det utviklar seg negativ ungdomskultur, og at dei oppheld seg utanfor skulen sitt område.

Avgrensa moglegheiter for å oppfylle Stortingsmelding 34 sine målsettingar om ein meire praktisk skule. Hafstad har ikkje tilstrekkeleg med plass til spesial- og grupperomma som trengs for å gjennomføre undervisinga i dei praktisk-estetiske faga på ein fagleg forsvarleg måte.

Ikkje tilrettelagt for elevar med funksjonsnedsettingar. Desse elevane har sjølvsagt like stor rett på ein trygg og god skulekvardag, som alle andre elevar.

Lite attraktivt miljø for lærarar og andre tilsette. Ein overfylt ungdomsskule, med dårleg tilrettelagde undervisingsareal, vil neppe lokke lærarar til «Hafstad ungdomsskule». Med tanke på storleiken på skulen, den sentrale beliggenheita, og mogleg utvikling av utfordrande ungdomskultur, er det naturleg å sjå føre seg at ein slik skule vil trenge ei betydeleg mengd med assistentar og miljøterapeutar. At desse ikkje har vorte tiltenkt noko eige arbeidsrom på skulen, syner ei alarmerande nedprioritering av det psykososiale arbeidet ved skulen.

Lite innsparing. Det er vanskeleg å sjå at det er stor innsparing på å slå saman to forholdsvis store skular, som stort sett har fulle klassar. Det vil verte ein skule med omlag like mange lærarar som det er på desse to skulane til saman. Ein vil kunne spare noko på administrasjon, men skulen vert så stor at ein treng større administrasjon enn det ein har på dei to skulane. Bygging av naudsynte spesialrom, og totalrenovering av eit per no meir eller mindre ikkje-ekstisterande uteområde, vil medføre betydelege meirkostnader.

Signer oppropet for å syne politikarane at vi ikkje ynskjer ein stor felles ungdomsskule i sentrum. Sjølv om det kan vere plass til elevane, vil det ikkje vere mogeleg å drive skule på ein forsvarleg måte. Kvaliteten vil gå drastisk ned og innsparinga er ikkje stor nok til å forsvare denne sturkturendringa.